الكاريزما ... من غير فتي!! - الحلقة (2): إبتسم!





كان المفروض اني أقعد أشرح وأهبد في كلام مجعلص عن الكاريزما واصلها وفصلها، لكن لا أنا في نفس أرغي، ولا متابعيني اللي يتعدوا على صوابع الايد الواحدة لهم في الرغي. نخش في الجد .. ونبتسم! من أول مقومات الكاريزما اللي بتزود إقبال الناس علينا وتشجعهم على التعامل معانا هي ابتسامتنا والراحة اللي بيشوفوها في وشوشنا لما يقابلونا ويتعاملوا معانا. يعني حتعلم كمان ازاي ابتسم؟؟!! وماله .. احنا بنتسلى، هم كم خطوة امشي عليهم وحتلقي ابتسامتك بقت جنان! الإبتسامة الحقيقية بتظهر في مكانٍ اساسيين: الفم والعينين. الابتسامة الحقيقية بتبان في المكانين دول، بينما الإبتسامة المصطنعة بتظهر على الفم فقط. كلنا عندنا قدرة عجيبة على فهم الابتسامة اللي الناس بتقابلنا بيها، وهل هي إبتسامة حقيقية من القلب ولا براني من ورا القلب. الحل الوحيد لجعل ابتسامتك حقيقية فعلاً هي انها تكون حقيقية فعلاً! حاول بقدر الامكان تبتسم طبيعي لما تقابل أي حد. افتكر حاجة بتفرحك أو موقف ظريف عدى عليك وخلي ابتسامتك طبيعية. دي شوية نقط حيساعدوك كتير في تظبيط ابتسامتك: 1. إبتسم قدام المراية: اقف قدام المراية، إبتسم! شغل جنبك حاجة بتضحكك، اقف قدام المراية تاني، إبتسم تاني! شفت الفرق بين الابتسامتين؟ لو ما لقيتش فرق واضح يبقى الموضوع أسهل بالنسبة لك، لكن غالباً اللي بيعمل التمرين ده بيحس إن الابتسامة في المرة الثانية أكثر صدقاً. 2. اعمل عبيط!! اعمل حركات بوشك ورا بعض. اضحك. إبتسم. كشر. بوز. احول. زعق. شلضم. كلضم. اعمل كل دول ورا بعض. الملامح إلي بنرسمها على وشنا مسؤول عنها عضلات الوجه، والعضلات دي زي أي عضلات تانية محتاجة تدريب، وعلشان تطوع عضلات وشك على الابتسام بالطريقة إلي إنت عاوزها لازم تدربها مرة يومياً على الأقل. ساعات كتير لما بنبتسم أو نضحك بزيادة وشنا بيوجعنا، بينما واحنا صغيرين كنا بنقعد نضحك زي الهبل بالساعات ومش بنتعب، ده لان عضلات وشنا المسؤلة عن الضحك والابتسام إتيبست من قلة الاستخدام. مرن عضلات وشك يومياً ... اعمل عبيط! 3. اتعلم "درجتين الابتسام": الابتسام له درجتين. الدرجة الأولي (الأهدى) هي اللي بتستخدمها لما حد يكون بيحكيلك عن موضوع عادي، الغرض من الإبتسامة دي هي تشجيع إلي قدامك على إنه يكمل كلامه، وتحسيسه انك معه ومهتم بكلامه. دي بتكون ديماً فيها رفعة حواجب خفيفة مع إبتسامة بدون أسنان (من غير ما تبين سنانك). الدرجة التانية (الأقوى) هي اللي بتستخدمها لما بترحب بحد، أو لما حد يحكيلك موضوع مفرح أو ظريف. الناس اللي عندهم ذوق عموماً بيعرفوا يستخدموا الدرجة التانية من الابتسام كويس، بيستخدمها كعلامة على الترحيب أو الإنبساط. اللي عندهم كاريزما وقدرت على جذب الآخرين هم اللي بيعرفوا يستخدموا الدرجة الأولى ببراعة، عندهم كده إبتسامة خفيفة بتشجع اللي قدامهم دايماً إنه يتكلم معاهم ويفتح قلبه. 4. لمع الفاترينة! الأسنان للوش زي الفاترينة بتاعة المحل. الفاترينة الحلوة بتعمل شغل وبتجيب زبون. الأسنان نفس الشيء. تنضيف، تبييض، تلميع، شيل جير .. يعني طقم سمكرة ودوكو حلو علشان تظبط معاك. في كتابي (Becoming a PEAK Performer ) أنا متكلم عن كذا دراسة عن فوايد الابتسام، وازاي إن الدراسات اثبتت إن الناس المبتسمة بيبانوا أكثر جاذبية وكمان أكثر ذكاء من المكشرين. نصيحة ليك من أخوك: ما تسيبش الابتسام عند أم إبتسام! ابتسامتك وضحكتك وبشاشتك لما بتقابل الناس من أهم الحاجات اللي بتظهرك وتلمعك، ابتسامتك في وش الناس صدقة، متبخلش بيها .. يابخيل! #وخد_من_أخوك!

1 view0 comments