الكاريزما ... من غير فتي!! - الحلقة (3): إترسم!
إترسم هنا معناها إنك تركز من جواك على المزايا اللي فيك، وتفكر نفسك دايماً بمهاراتك وانجازاتك. دماغنا الوسخة - لا مؤاخذة - دايماً بتاخدنا للسلبيات اللي في حياتنا خاصة لما نكون داخلين على تجربة جديدة. تخيل نفسك قاعد مستني تدخل انترفيو شغل، غالباً حتلاقي دماغك وخداك في سكة ضلمة. شفت الشباب اللي عالمكاتب؟ دي عيال بتبرق! مش إنت يامقشف! ولا البت اللي بتركن الاوبل تحت، يعني دي ممكن تبقى زميلتك؟! ولا شوية الانجليزي أبو اكسنت اللي السكرتيرة رطنتهم وانت في الويتنغ اريا. الله يرحمك يا أستاذ بشبيشي ويسامحك على اللي عملته في لساننا! كل ده بيحصل ساعة الانترفيو، وكل ده غلط! الوظيفة دي محتاجة شروط معينة، وانت جاي تقدم لأنك شايف أن الشروط دي موجودة فيك، أو على الأقل عندك العزم والشطارة اللي يخلوك تتعلم بسرعة. يبقى خلي عندك ثقة في نفسك وركز دماغك على المهارات والاستعداد اللي عندك، وكل لما دماغك تاخدك ناحية السكة الضلمة امسك في حاجة من اللي بتعرف تعملهم واتشعلق بيها علشان تخليك في النور. أنا شخصياً جربت الموضوع ده كتير، في أوقات كتيرة كان بيجيلي إحساس بعدم الثقة في قدراتي على القيام بمهمة معينة أو حتى قدرتي على تعلمها، كنت بحس اني مش شاطر بما فيه الكفاية واني "حتقفش"أول ماأتكلم . دي ظاهرة معروفة باسم "متلازمة المحتال" imposter syndrome، معناها إن الناس الشاطرين في عملهم بيفتكروا دايماً انهم مش شاطرين ولا حاجة وان اللي حواليهم حيقفشوهم ويكتشفوا انهم محتالين ومش شاطرين ولا يحزنون. احنا بقى عملنا متلازمة تانية ضدها اسمها "أنا مش قصير أوزعة أنا طويل واهبل!" اتعلمت اني في كل مرة بقابل حد مهم وباكون محتاج اني أسيب انطباع كويس معاه بفكر نفسي أني "الفركيكو"، أنا الواد المخلصاتي اللي فاهم شغله كويس واللي ممكن يتعلم أي حاجة في السريع، الاحساس ده كان بيخليني أدخل على أتخن تخين بثقة وثبات، والثقة والثبات دول بيبانوا عليك من غير ماتحس. بس أمانة عليك اوع تفهمني غلط! الرسمة اللي بتترسمها دي داخلي مش خارجي! ده نوع من التجهيز والاستعداد الذهني mental preparedness اللي بيبانوا من غير ما إنت تتكلم عنهم. لو اتكلمت حيبقى تنطيط ومنظرة، ودول من أعتى أعداء الكاريزما. الناس اللي بتقابلك لازم تحس إن عندك ثقة بنفسك، والثقة دي سببها شطارتك ومهارتك. الناس لازم تحس بكدة من غير ما سيادتك تتكلم أو تشرح لهم حاجة. برغم إن الموضوع يبان صعب انما في الحقيقة تنفيذه سهل. اعمل call لنفسك واقنعها أد إيه إنت شاطر ومجتهد، وبعدين اخرس خالص! سيب اللي قدامك يقرا الثقة دي في تصرفاتك، مش يسمعها في كلامك. الخلاصة: ابني لنفسك سيستم تحفيز يخلي ثقتك الداخلية بنفسك دايماً عالية، ده حيخليك تقاوم الأحاسيس السلبية اللي في دماغك واللي بتخلي الناس اللي قدامك يحسوا انك مهزوز. الثبات والثقة من أهم متطلبات الكاريزما وهم عوامل جذب الآخرين ونيل ثقتهم. الشطارة إن الثقة دي تبان في شكلك وتصرفاتك من غير ما تتفتف بكلام ملوش لازمة. #وخد_من_أخوك