الكاريزما ... من غير فتي!! - الحلقة (4): إتعزز!

الكاريزما ... من غير فتي!! - الحلقة (4): إتعزز! معظم الكتب والخبراء اللي كتبوا عن الكاريزما عملوا خلط بينها وبين "الشعبية" being charismatic and being popular. يعني خلط ما بين الشخصية الكاريزمية والشخصية اللي لها شعبية. أن تكون مشهورًا وليك شعبية يعني أن الجميع معجب بيك ، ولكن ده لا يعني بالضرورة أنهم حيمشوا وراك ويسمعوا كلامك في كل حاجة بتطلبها منهم. من ناحية أخرى، الكاريزما بتسمح لك بقيادة الناس للقيام بأشياء تتجاوز واجباتهم بس علشان يرضوك. وده اللي احنا عاوزين نوصل له. النقطة دي مهمة ليه؟ لان معظم اللي كتب في موضوع الكاريزما بيوصونا اننا نكون مستمعين جيدين لكل الناس اللي حوالينا، واننا نظهر شغف واهتمام شديد بكل حاجة بيقولوها، واننا ندي إحساس بالدفء والاهمية لكل حد بيتعمل معانا. وده كلام جميل جداً علشان نبني شعبيتنا وسط الناس، لكن مش بالضرورة حيخلي الناس دي تسمع كلامنا. حكيلكوا حكاية. اشتغلت مع مدير كان "عقر". كان supportive جداً ومتعاون جداً ... ومشغول جداً! كان عنده قدرة رهيبة إنه يوريني إن ال-١٠ دقايق اللي مديهم لي دول قاطعهم من لحمه الحي، وان فيه بلاوي لازم يروح يخلصها بس هو علشان بيعزني حيديني من وقته الثمين ويسمع لي. النقطة دي هي أساس واحدة من أهم قواعد بناء الكاريزما بالنسبة لي: be present but don't be too available يعني ببساطة خلي عندك حضور قوي، خلي عندك شغف واهتمام بالكلام اللي الناس حواليك بيقولوه، واظهر لهم انك مهتم باللي بيقولوه، لكن من خلال الوقت المحدد اللي إنت متاح لهم فيه. إنت مش فاضي لهم في كل وقت. بالعكس، إنت وراك حاجات كتير وعندك مشاغلك. تخيل لو رايح إنت والمدام تشتروا خلاط جديد، شفتم واحد مش بطال ويفي بالغرض، طلبتم من البياع يجيب لكم واحد من المخزن. الراجل إبتسم وقال لكم "ثانية واحدة يافندم أشيك عالسيستم إذا كان لسة فاضل منه في المخزن ولا لأ. النوع ده أصله ممتاز وعليه سحب كتير." الراجل قعد يدقدق عالكي بورد ويبحلق في المونيتور. بذمتك، مش ساعتها بتحس إن الخلاط ده أغلى عندك من ضناك؟ وان حتبقى مصيبة وكارثة لو كان مش موجود؟! ده شيء طبيعي، البضاعة المرطرطة غلاوتها في الأرض، والبضاعة الشاحة غلاوتها في السما. نفس الشيء ينطبق على وقتنا، وهو فيه أغلى من الوقت اللي لما بيعدي مش بيرجع تاني؟ وقتك ده غالي ومش بالسهل تفرط فيه، لازم اللي حواليك يحسوا بكده، وساعتها حيحبوك وغلاوتك حتزيد لما يلاقوك بتديهم من وقتك ده علشان تسمع لهم. واحدة من الناس اللي اتعاملت معاهم كان عندها مشكلة مع مديرينها، كانوا اجانب ومش عايشين معاها في نفس البلد، وبيجوا زيارة كل اسبوعين تلاتة، ودايماً مش حاسين بشغلها ولا بيظهروا إهتمام أو إعجاب باللي هي بتعمله. لما اتكلمت معها وعن جدولها خلال الزيارة اللي بيقوموا بيها اكتشفت انها بتحط موبايلها عالصامت طول ما هم موجودين، وانها بتنبه على التيم بتاعها إن محدش يكلمها طول مالمدراء دول موجودين. وانها بتفرغ نفسها تماماً لهم خلال الزيارة. طلبت منها أنها تغير طريقتها خلال زيارتهم المقبلة. تقول لهم انها منتظرة مكالمات مهمة جداً بخصوص الشغل وإنها حتضطر ترد على المكالمات دي لو جت، وساعة الغدا تقوم تخلص مكالماتها ومتقعدش معاهم أكتر من نص الوقت. قالت لي بعدها إن الوضع إختلف تماماً، فجأة أصبحوا عاوزين يتكلموا معها أكتر، وياخدوا رأيها أكتر. الطلبات بتاعة كل مرة بقت أقل، والشكر والثناء على مجهودها زادوا. كل اللي هي عملته إنها مابقتش too available، وده حسس الناس بقيمتها. تاني .. اوع تفهمني غلط! مش المقصود انك تصد الناس علشان إنت مشغول، المقصود انك تسمع للناس على الرغم انك مشغول، وانهم يبقوا عارفين ده. المقصود كمان انك تسمع وتتحاور مع أبو كلام موزون، أما اللي جاي يهري فانت بكل ذوق ودبلوماسية تفهمه انك مش فاضي. الخلاصة بالنحوي! بناء الكاريزما لا يعني توزيع الاهتمام والشغف لكل شخص يقترب منك. بل بإعطاء أذن مستمعة وعقل متفتح لمن حولك، ثم بهدوء ودبلوماسية إغلاق أولئك الذين يتحدثون بلا معنى، مع تشجيع أولئك الذين لديهم وجهة نظر على الاستمرار. يجب ألا تكون متاحًا جدًا، ويجب ألا يكون كسب اهتمامك ومشاركتك أمرًا سهلاً. مثل أي منتج في السوق، كلما زادت صعوبة الوصول إليه، كلما ارتفع سعره وزاد رضا من يحصل عليه. #وخد_من_أخوك لو سمحت، خد دقيقة من وقتك وجوب على "إختبار الرطرطة" إلي في الصورة المرفقة. دي مجموعة من الأسئلة حتساعدك تعرف إذا كنت too available ولا برنس في نفسك؟! أرجوك! خلي بالك! ممكن الاجابات تختلف حسب الفئة إللي بتتعامل معاها، يعني ممكن تكون انسان دايماً متواجد لعيلتك أو لشغلك، لكن مش دايماً متاح لصحابك. لازم تحدد الفئة اللي عاوز تقيس مدى تواجدك معاها. أرجوك! خلي بالك! الرطرطة شيء مش وحش أبداً! جميل إنك تكون متواجد دايماً للناس اللي بتحبهم ويحبوك. الناس دي إنت مش محتاج تبني معاهم كاريزما ولا يحزنون لانك بتحبهم وبيحبوك. الأسئلة دي علشان الناس اللي عاوز تبني معاهم شخصية كاريزمية وتخليهم يطاوعوك ويسمعوا كلامك.