الكاريزما ... من غير فتي!! الحلقة (1)



كلمة "كاريزما" ملهاش ترجمة حرفية دقيقة باللغة العربية. الكاريزما هي القدرة على جذب الناس و التأثير عليهم. الشخصية الكاريزمية بيبقى لها قدرة على جذب اللي بيتعاملوا معاهم وجعلهم يتعلقوا بيه. صاحب الشخصية الكاريزمية عنده القدرة على التواصل مع الناس وإقناعهم بدون الحاجة إلى تقديم حلول أو تنازلات. أستاذي العظيم استاذ جراحة الأطفال "نور الخولي" رحمة الله عليه كان أول من حكالي عن الشخصية الكاريزمية، كان بيحكي عن طبيب إمتياز عندهم في القسم، وازاي إن الدكتور ده بعد أسبوع من استلامه العمل في القسم كان مخلي كل الناس تشتغل بطريقته وعلى مزاجه، حتى النواب اللي المفروض انهم مديرينه! كان ساعتها دكتور نور هو أحد المسؤلين عن تنظيم مؤتمر جراحة الأطفال، وكانوا محتاجين تبرعات ورعاة علشان المؤتمر يتم، فبدأ ياخد معاه الشاب ده في مقابلاته مع المتبرعين والرعاة، وفعلاً .. المعاناة في جمع التبرعات اختفت! والناس بقت بتتبرع باكتر من المتوقع، لمجرد أن دكتور الإمتياز ده هو اللي كان بيتكلم وبيطلب التبرعات. الدكتور ده ما دخلش في نقاشات، ولا وعد المتبرعين بشيء زيادة، شخصيته الكاريزمية وقدرته على جذب الناس هي اللي عملت الشغل كله! الناس بدأت تهتم أوي بموضوع الكاريزما، وبدأت تحس بأهميته في النجاح في الحياة. وللاسف ظهر فتي كتير (محلي ومستورد!) حوالين الكاريزما. فخلينا نقول كلمتين عن الكاريزما يمكن الصورة تبقى أوضح. في حلقة النهاردة حنتكلم عن أشهر "الخرافات" المرتبطة بموضوع الكاريزما: أول خرافة! "الكاريزما معتمدة على الشكل وجاذبية المظهر". طبعاً الشكل الخارجي له دور محترم في إقناع الناس انهم يمشوا وراك ويسمعوا كلامك. بس خد عندك: هتلر بشنبه، تشرشل بكرشه، نابليون بقصره، اوباما بودانه! كل دول شخصيات كاريزمية ومعروف عنها أن الناس انجذبت ليهم ومشت وراهم برغم أنهم ماكانوش محمود حميدة، ولا حتى محمود المليجي! المتخصصين في علم النفس اكتشفوا من زمان إن موضوع الشكل الخارجي ده أعمق وابعد من الشعر المسبسب والعيون الدبلي. وان فيه عوامل تانية كتير هي اللي بتتحكم في إستقبال الناس لشكلنا، مثلاً: طريقة اللبس،طريقة الوقوف والحركة (posture)، طريقة الابتسامة، حركة الأيدي، نظرة العين ... كل دي نقط في شكلنا بتأثر على إستقبال الناس لينا، والأهم اننا ممكن نتحكم فيها وندربها علشان تخلينا "كارزمتيك" أكتر. إيه أهمية النقطة دي؟ أهميتها اننا تعرف إن الكاريزما مهارة ممكن اكتسابها وتعلمها مش بس شكل خارجي وجمال وش، ولو مش مصدقني اسألوا نمبر وان! ثاني خرافة! "الكاريزما هي سر النجاح في الحياة". الكاريزما ممكن تسهل لك البداية، وتخليك تبان وتظهر وكمان تنجح في الأول، لكنها لا يمكن تاخدك لقمة النجاح في الحياة بدون عمل واجتهاد. استاذي الدكتور نور الخولي حكى قصة طبيب الامتياز وانها حصلت معاه لما كان لسة مدرس في القسم، يعني من أكتر من ١٥ سنة ساعة ما حكاها، الملفت للنظر إنه ما قالش الدكتور ده دلوقتي بيعمل إيه ولا وصل لفين. وده معناه غالباً إن الراجل ما وصلش لمركز مهم في مجاله. أنا عن نفسي كان لي صديق ، دكتور (و) عنده كاريزما منقطعة النظير، وكانت حياته دايماً أسهل من حياة زملاته ودفعته اللي كانوا بيتعبوا أوي علشان ياخدوا شوية من الامتيازات اللي هو كان بياخدها حتى من غير ما يطلب، النهاردة وبعد مرور الوقت هو برة المنافسة في مجاله، وزملاته هم اللي اصبحوا مشهورين في مجالهم أكتر منه بكتير، لانه ببساطة إعتمد بس على الكاريزما ومطعمهاش بشغل أو إجتهاد يطلعوه لقدام. إيه أهمية النقطة دي؟ أهميتها اننا تعرف إن الكاريزما بتفتح أبواب انما متكسبش سباق. اللي بيعتمدوا بس على الكاريزما في حياتهم عاملين زي الست الحلوة اللي معتمدة بس على حلاوتها علشان جوزها يفضل متعلق بيها، ودول أكتر ناس بتطلق. تالت خرافة! "المرح والانطلاق هم أساس الكاريزما". الشخصية المرحة والمنفتحة (extrovert) بتقدر "تاكل الجو" من اللي حواليها، وبتقدر تخلي الناس تتابعها وتسمعها أكتر. لكن ده مش معناه أبداً إن الناس تتعلق بيها أو تسمع كلامها. بالعكس، في الزمن اللي احنا فيه ده الناس بقت ب"تستهيف" اللي بيتكلم كتير، وبقت بتحب التقيل الراسي قليل الكلام. مرة كنا مجموعة بنشتغل مع بعض ونازلين بعد الشغل نتقابل، الكل كان موجود إلا زميل لينا، ولما سألت عنه زملاتي قالوا لي أنهم معزمهوش، لانهم عايزين يتكلموا في موضوع جد وهو راجل بيهزر ويتكلم كتير! حسيت ساعتها بالفرق بين أن الناس تحبك وانها تحترمك. إيه أهمية النقطة دي؟ أهميتها اننا تعرف إن الكاريزما مش معناها انك تبقى شكوكو، ولا معناها انك تبقى حسين فهمي. مش لازم تكون كوميديان علشان الناس تحبك، ولا لازم تكون مخشب علشان الناس تحترمك. إنت ممكن تبني كاريزما وشخصية جذابة بانك توصل لتوازن بين الاتنين. إيه هي مقومات الكاريزما؟ وازي يبقى عندك شخصية أكثر قبولاً عند الناس؟ تابعونا في الحلقات القادمة! #وخد_من_أخوك!

1 view0 comments

Contact Us

1860 Appleby Line, Unit 114

Burlington, ON, L7L 7H7

Canada

​​Tel: (289) 635-6311

info@peakupnow.com

  • facebook PEAK Performer Career
  • Twitter PEAK Performer Career
  • Instagram PEAK Performer Career
  • Black YouTube Icon
I want to ...

© 2023 by peakupnow | All rights reserved