نعمل إيه علشان نربي عادات مفيدة؟




العادات المفيدة محتاجة ٣ حاجات علشان تكبر وتثبت عندنا: إدي مساحة، تدرج في الممارسة، خلي معاك عصاية وجزرة. - إدي مساحة: إدي مساحة زمنية (وقت) و مكانية (مكان) علشان تمارس فيه العادة دي. الوقت والمكان دول ثابتين مابيتغيروش، ومش ممكن ملئهم بشيء آخر. مثلاً: فلنفرض انك عاوز تتعلم ألماني، يبقى حتثبت نص ساعة كل يوم لمذاكرة الألماني، مثلاً من الساعة ٩:٣٠ إلى ١٠ مساء، الوقت ده من النهاردة لمذاكرة الألماني وبس! مافيش تليفونات، مافيش فيسبوك، مافيش نزول مع أصحابك. فيه ألماني وبس! - تدرج في الممارسة: كلنا في البداية بتبقى واخدانا الحماسة، وبالتالي غالباً سعادتك حتقول لي: نص ساعة إيه؟؟!! ده أنا ناوي ألم الألماني ده في أسبوع! أحب أقول لسيادتك das wird niemals passieren،يعني هذا لن يحدث أبداً! اعقل كده يا عزيزي ومشيها نص ساعة، المهم المواظبة والاستمرارية. أنا هنا مش حقول لك تذاكر ازاي وتتعلم إيه، أنا بس بأرجوك انك تلتزم بالنص ساعة. - خلي معك عصاية وجزرة: لما حتتعلم ألماني حيبقى عندك فرصة للسفر لهذا البلد الجميل، وممكن تقدم على هجرة كمان، لا وكمان مكن تشتغل في نفس مجال خبرتك، آه والله! ولو مالكش في السفر ممكن تشتغل في بلدك وتقبض أضعاف زملاتك، وتتجوز ست الحسن، وتناسب السيد المحافظ، وتجيب عربية بتكييف، و..و..و.. كل ده بلح!! ولا تحطه في بالك! لأن كل دي أهداف على المدى الطويل دماغ سعادتك الضيقة وبال سعادتك الأضيق مابيستحملهاش. والدليل إنك بالفعل عارف كل الفوايد العظيمة لتعلم اللغة الألمانية إللي أنا لسة قايلها وبرضه الباشا لسة ميح في الألماني. احنا دماغنا أبسط من متابعة الأهداف طويلة الأجل دي فخلينا في العصاية والجزرة. سمّعت لنفسك آخر الأسبوع يبقى من حقك عشوة محترمة مكافأة على مجهود سيادتك، سمّعت ولقيت نفسك مش مذاكر يبقي سندوتش جبنة وخيار يافاشل! عملت شغل حلو يبقى تستاهل باكو شوكلاتة مدملك، خسّعت يبقى فصين برتقال ومن غير صرة!! المعاملة الوقتي دي بتخلينا نتشجع نكمل، لحد ما نوصل لمرحلة إن النص ساعة ألماني دي بقت عادة متأصلة وروتين ثابت في حياتنا. وربنا ما يقطع لك عادة! #وخد_من_أخوك!

0 views0 comments

Contact Us

1860 Appleby Line, Unit 114

Burlington, ON, L7L 7H7

Canada

​​Tel: (289) 635-6311

info@peakupnow.com

  • facebook PEAK Performer Career
  • Twitter PEAK Performer Career
  • Instagram PEAK Performer Career
  • Black YouTube Icon
I want to ...

© 2023 by peakupnow | All rights reserved